اسم شبیر مری آنکھ کا نم کھینچتا ہے

 عارفانہ کلام حمد نعت منقبت

کھینچتا رہتا ہے سانسوں کو بہم کھینچتا ہے

اس کا احسان ہے سینے میں جو دم کھینچتا ہے

چودہ ناموں کاہی حلقہ مِرے قرطاس پہ ہے

دائرہ ایک ہی بس میرا قلم کھینچتا ہے 

خود بخود چلتی چلی جاتی ہوں میں کوئے نجف

با خدا کوئی تو ہے میرے قدم کھینچتا ہے

میں تو فطرت میں قلندر ہو فقیری میں ہوں خوش

اور ہوں گے وہ جنہیں جاہ و حشم کھینچتا ہے

درجب حد سے گزرتا ہے دلاسے کے لیے

اپنی جانب مجھے ایک سبز علم کھینچتا ہے

سر جھکائے میں چلی آتی ہوں ان کے در پہ 

میں کہیں پر ہوں مجھے بابِ کرم کھینچتا ہے

حوصلہ میرا بڑا ہے یا زمانے کا چلن

کب تلک دیکھیے یہ سب و شتم کھینچتا ہے

دین و دنیا میں توازن نہیں ہونے پاتا

کبھی کعبہ تو کبھی مجھ کو صنم کھینچتا ہے

تا قیامت نہیں رکنے کا یہ گریہ ثروت

اسمِ شبیرؑ مری آنکھ کا نم کھینچتا ہے

ثروت رضوی