عارفانہ کلام حمد نعت منقبت
ہلالِ محرم
آسماں پر جب نظر آیا محرم کا ہلال
کیا بتاؤں ہمنشیں دل نے کیے کیا کیا سوال
یہ ہلالِ نو کہیں مشکِ سکینہؑ تو نہیں
موت کا عباسؑ کے رُخ پر پسینہ تو نہیں
کیا تعجب ہو جو گہوارہ ہو یہ بے شیر کا
یا نشاں ہو پائے عابدؑ میں گِراں زنجیر کا
ضوفشاں شاید حُرِ غازی کی یہ تقدیر ہے
یا زبیر قین کی پیری کی یہ تصویر ہے
اصغرؑ بے شیر کی ہنسلی کا ہوتا ہے گماں
یا پھر بازوئے زینبؑ پر رسن کا ہے نشاں
گردنِ عابدؑ پہ ہے یا خطِ طوقِ آہنی
یا تبسم ہے یہ قاسمؑ کا بوقتِ جاں کنی
خلق کو نصرت مہِ انور کا ہے جس پر گماں
وہ بہ تحریرِ جلی ہے کربلا کی داستاں
نصرت زیدی
No comments:
Post a Comment