فکر فردا سے غافل کسے ہوش ہے

 فِکرِ فردا سے غافِل کسے ہوش ہے

ساری اُمّت فلسطیں پہ خاموش ہے

زُہد و تقویٰ عبادت میں مَدہوش ہے

ساری اُمّت فلسطیں پہ خاموش ہے

دَرد اِنسان سے عاری بنی مُعتکِف

حُکمِ باری، نبٌی سے ہوئی مُنحرِف

ہے تغافُل میں، اَحساں فراموش ہے

ساری اُمّت فلسطیں پہ خاموش ہے

ہیں بپا یہ قیامت کے منظر سبھی

میّتیں جا بجا بے کفن ہیں پڑیں

خُوں میں لتھڑی بھی ہر ماں کی آغوش ہے

ساری اُمّت فلسطیں پہ خاموش ہے

بے ضمیری کی ذِلّت میں ہیں حُکمراں

اور وردی میں خاموش ہیں پاسباں

جشنِ اَغیار میں پر یہ ہمدوش ہے

ساری اُمّت فلسطیں پہ خاموش ہے

خَوف طاری رہا بحر و بر، پر تِرا

تھا فضاؤں پہ غلبہ تِرے نام کا

سُن مُجاہد تِرا جذبہ کم کوش ہے

ساری اُمّت فلسطیں پہ خاموش ہے

فِرقہ بازی کے ہر وار پر دسترس

کم نہ ہونے پہ آئی یہ حِرص و ہوَس

عالموں کا بھی گُم سُم ہُوا جوش ہے

ساری اُمّت فلسطیں پہ خاموش ہے

دستِ قدرت پہ رکھنا یقیں اور ہے

شوقِ میداں کا مَرد و مکیں اور ہے

جو بھی آگے بڑھے وہ ہی نِردوش ہے

ساری اُمّت فلسطیں پہ خاموش ہے

لب کُشا اب لیاقت ہُوا ہے قلم

کہ نہیں اس کو اَحساسِ ظُلم و سِتم

بَحرِ ظُلمت میں ڈوبی یہ مَےنوش ہے

ساری اّمّت فلسطیں پہ خاموش ہے

لیاقت منظور بھٹہ