بارش ہوئی تو شہر کے تالاب بھر گئے
کچھ لوگ ڈُوبتے ہوئے دُھل کر نکھر گئے
سُورج چمک اُٹھا تو نگاہیں بھٹک گئیں
آئی جو صُبح نو تو بصارت سے ڈر گئے
دریا بپھر گئے تو سمندر سے جا ملے
ڈُوبے جو ان کے ساتھ کنارے کدھر گئے
بُجھتے ہوئے چراغ ہتھیلی پہ جل گئے
جھونکے تمہاری یاد کے دل میں اُتر گئے
سوچا تمہیں تو درد کی صدیاں پگھل گئیں
دیکھا تمہیں تو وقت کے دریا ٹھہر گئے
تم تو بھری بہار میں کھلتے رہے مگر
ہم زخمِ کائنات تھے کانٹوں سے بھر گئے
عشرت! شبِ نشاط کے جگنو لیے ہوئے
ہم جشن زرنگاہ میں پریوں کے گھر گئے
عشرت رومانی
No comments:
Post a Comment