حسن جس جس کو ملا اس کو جفا بھی آئی

حسن جس جس کو ملا اس کو جفا بھی آئی

ناز کے ساتھ تغافل کی ادا بھی آئی

چار جانب تھا اندھیرا ہی اندھیرا گھر میں

آپ آئے تو آنکھوں میں ضیا بھی آئی

تیغِ قاتل نے جو مقتل میں کیا قتل مجھے

جان کے ساتھ مِرے لب پہ دعا بھی آئی

بارور نخلِ تمنا ہو مِرا کیا ممکن

آہِ پر سوز اسے آگ لگا بھی آئی

دیکھ تو رحمتِ باری کے کرشمے ساقی

رِند میخانے میں آئے تو گھٹا بھی آئی

کم نہیں رہبرِ صادق سے بلاؤں کا نزول

ان کے آنے سے ہمیں یادِ خدا بھی آئی

بجھ گیا آہ، چراغِ دلِ سوزاں بھی مِرا

گور میں بادِ فنا بعدِ فنا بھی آئی

اک فقط میں ہی تو ناکام نہ آیا ظالم

خاک اڑاتی تِرے کوچے سے صبا بھی آئی

کیا کرے میری دعا جب کوئی سنتا ہی نہیں

وہ تو زنجیر درِ عرش ہِلا بھی آئی 

دردِ پیہم سے اب اے جوشؔ مِرا حال ہے یہ

کھُل گئی آنکھ، اگر نیند ذرا بھی آئی

جوش ملسیانی