کبھی نظر تو آ تسکین اضطراب تو دے

کبھی نظر تو آ، تسکین اضطراب تو دے

مِری کھلی ہوئی آنکھوں کو کوئی خواب تو دے

جواز ڈھونڈ نہ برسوں کی رنجشوں کا مگر

قریب آ کے تماشائے اجتناب تو دے

کبھی تو سنگِ صدا توڑ دے سکوتِ وفا

کبھی وہ خواب میں آ کر دمِ سراب تو دے

میں زخم تشنہ لبی سے لپٹ کے رو لوں گی

نہ دے سکونِ وفا، قہر اضطراب تو دے

نہ چھین ہم سے ہی یک گونہ لذتِ تدبیر

نسیمِ مسندِ گل، عرصۂ حباب تو دے

بچھڑ کے ملنے میں لذت سہی مگر ناہیدؔ

کبھی تو وصلِ مسلسل کا ہی عذاب تو دے

کشور ناہید