چمک دمک پہ نہ جاؤ کھری نہیں کوئی شے

چمک دمک پہ نہ جاؤ کھری نہیں کوئی شے

سوائے شاخِ تمنا ہری نہیں کوئی شے

دلِ گداز و لبِ خشک و چشمِ تر کے بغیر

یہ علم و فضل، یہ دانشوری نہیں کوئی شے

تو پھر یہ کشمکشِ دل کہاں سے آئی ہے

جو دل گرفتگی و دلبری نہیں کوئی شے

عجب ہیں وہ رخ و گیسو کہ سامنے جن کے

یہ صبح و شام کی جادوگری نہیں کوئی شے

ملالِ سایۂ دیوارِ یار کے آگے

شبِ طرب! تِری نیلم پری نہیں کوئی شے

جہانِ عشق سے ہم سرسری نہیں گزرے

یہ وہ جہاں ہے جہاں سرسری نہیں کوئی شے

تِری نظر کی گلابی ہے شیشۂ دل میں

کہ ہم نے اور تو اس میں بھری نہیں کوئی شے

احمد مشتاق