ساقی تری صحبت میں کیا عالم مستی ہے

ساقی تِری صحبت میں کیا عالمِ مستی ہے

جنت مِری نظروں میں اجڑی ہوئی بستی ہے

کیوں جام کو مِینا سے یوں دور کیا تُو نے

محفل تو ابھی ساقی! پینے کو ترستی ہے

مے خانۂ ہستی میں یہ جوڑ نہ ٹوٹے گا

مستی ہے تو رِندی ہے، رِندی ہے تو مستی ہے

پھر فصلِ بہاراں میں آباد ہوئے گلشن

میرے دلِ ویراں پر حسرت ہی برستی ہے

کیا اوج دیا مجھ کو اس حسنِ تخلص نے

اے عرشؔ مِری دنیا بے گانۂ پستی ہے

عرش ملسیانی

پنڈت بال مکند