کیوں کرتے ہو دنیا کی ہر اک بات سے توبہ

کیوں کرتے ہو دنیا کی ہر اک بات سے توبہ

منظور تو ہے میری ملاقات سے توبہ

کیونکر نہ کروں شورِ مناجات سے توبہ

آغاز ہو جب چار گھڑی رات سے توبہ

زاہد سے چھپایا ہے اسے گوشۂ دل میں

بھاگی تھی کسی رندِ خرابات سے توبہ

یہ فصل اگر ہو گی تو ہر روز پئیں گے

ہم مہ سے کریں توبہ کہ برسات سے توبہ

تعریف صنم بات ہے پتھر نہیں زاہد

کیا ٹوٹ گئی حرف و حکایات سے توبہ

الله دکھائے نہ مجھے روز و شبِ ہجر

اس دن سے حزر کیجیے اس رات سے توبہ

خود ہم نہ ملیں گے نہ کہیں جائیں گے مہماں

کی آپ نے واللہ نئی "گھات" سے توبہ

پھسلاتے ہیں کیوں آپ مجھے حضرتِ ناصح

منت سے کروں گا نہ مناجات سے توبہ

دنیا کی کوئی بات ہی اچھی نہیں زاہد

اس بات سے توبہ کبھی اس بات سے توبہ

امید ہے مجھ کو یہ ندا آئے دمِ مرگ

مقبول ہوئی اس کی عنایات سے توبہ

یہ داغِ قدح خوار کے کیا جی میں ہے آئی

سنتے ہیں کیے بیٹھے ہیں وہ رات سے توبہ

داغ دہلوی