سچ پوچھو تو خود سے رو گردانی ہے

 سچ پوچھو تو خود سے روگردانی ہے

تیری صورت مشکل سے پہچانی ہے

کس کو چھوڑوں کس کی پیاس بجھاؤں میں

مشکیزے میں اک دو گھونٹ ہی پانی ہے

گھوڑوں کی ٹاپوں سے لرزا طاری ہے

گھاٹی کے اُس پار رسد پہنچانی ہے

عشق کیا جب آدھے پونے جذبوں سے

ظاہر ہے پھر ہم نے منہ کی کھانی ہے

جینے والوں میں تو بنتا ہے, لیکن

مرنے والوں میں بھی کھینچا تانی ہے

اس کمرے سے جان چھڑانے والا ہوں

بس اک یاد کو تھوڑی جھاڑ پلانی ہے

تجھ سے اپنا آپ علیحدہ کرنا ہے

یعنی پانی پر تلوار چلانی ہے

کام آئے گی یار مجسمہ سازی میں

ان ہونٹوں سے ایک ہنسی کھِسکانی ہے

ہر شاعر کا شعر ہی اچھا ہے ساحر

ہر بندے کی اپنی رام کہانی ہے

جہانزیب ساحر