سنا ہے لوگ ان پر مر رہے ہیں

 سنا ہے لوگ ان پر مر رہے ہیں

جو خود جینے سے اب تک ڈر رہے ہیں

ہے دعویٰ پاکئ داماں کا ان کو

ہزاروں قتل جن کے سر رہے ہیں

مراسم اب کہاں وہ پہلے جیسے

گزارا ہو رہا ہے، کر رہے ہیں

تعلق رکھ رہے ہیں واجبی سا

ہمیں کیا کیا گماں جن پر رہے ہیں

محبت میں ہمیشہ امتحاں کے

نتائج بد سے بھی بد تر رہے ہیں

کبھی سرزد ہوا تھا جرمِ الفت

وہی تاوان اب تک بھر رہے ہیں

ہوئے ناکام اکثر وہ جہاں میں

سبق جن کو سبھی ازبر رہے ہیں

بشریٰ خلیل