وارفتگئ شوق کی شدت نہ پوچھۓ
کیا ہے دلِ خراب کی حالت نہ پوچھۓ
یہ عشق ہے کہ ایک مصیبت نہ پوچھۓ
آوارگئ کوئے ملامت نہ پوچھۓ
ہم تو درِ حبیب کے سجدہ گزار ہیں
ہم سے رموزِ زہد و عبادت نہ پوچھۓ
گزری ہے یوں اچٹتی نظر سے کتابِ زیست
عنوان کیا ہے، کیا ہے عبارت نہ پوچھۓ
یہ دیکھئے کہ اس میں ہے گم ایک کائنات
کیا چیز ہے یہ حرفِ محبت نہ پوچھۓ
پامالِ صد امید ہیں، محرومِ آرزو
گزری ہے جان و دل پہ قیامت نہ پوچھۓ
کب ان سے ہو سکا ہے مِرے درد کا علاج
اِس پر تکلفاتِ عیادت نہ پوچھۓ
وہ بے نیاز کب نہ رہا راہِ عام سے
سرور اور اس کا رنگِ طبیعت نہ پوچھۓ
سرور عالم راز
No comments:
Post a Comment