آدھا جیون بِیتا آہیں بھرنے میں
آدھی عمر توازن قائم کرنے میں
آئینہ بےچارہ خود ہے زنگ آلود
بجھ جائے گا چہرے روشن کرنے میں
دنیا تو پتھر ہے، پتھر کیا جانے
کتنے آنسو چیخ رہے ہیں جھرنے میں
اک پُل جوڑ رہا ہے دو دنیاؤں کو
اک پَل حائل ہے جینے اور مرنے میں
ایک صحرا اور ایک جزیرہ حائل ہے
ڈوبنے اور سمندر پار اترنے میں
مرنے والا دیکھ رہا تھا سب ناٹک
سب مصروف تھے اپنی جیبیں بھرنے میں
شبنم رومانی
No comments:
Post a Comment