شہرِ بدن میں پھیلتے خدشات کے عوض
بیچا نہیں ہے بھوک کو خیرات کے عوض
جھوٹی ادا کا ہر کوئی ہوتا نہیں اسیر
دل بِک سکا نہ نقد اشارات کے عوض
بادل کی دوستی بڑی مہنگی پڑی مجھے
گھر کو بہا کے لے گیا برسات کے عوض
آتا نہیں ہے اور کچھ اس کے سوا مجھے
بیچے ہیں شعر تنگئ حالات کے عوض
شب بانٹنے سے قبل ذرا سوچ لے یہ بات
ملتی نہیں ہے روشنی ظلمات کے عوض
جب تک مِری وفاؤں کا ٹوٹا نہ تھا بھرم
کافی تھا ایک شخص ہی بہتات کے عوض
سر پر ہجوم سنگ زن اس پر تِری جفا
صدمات ہی ملے مجھے خدمات کے عوض
کس نے کہا کہ رخت و زر وجہِ سکون ہے
راحت ملی نہیں کبھی آلات کے عوض
تابش عدم سے آ گئی رخصت کی جب صدا
مہلت ملی نہ پھر مجھے صدقات کے عوض
شہزاد تابش
No comments:
Post a Comment