ساجن نے مرا روپ نرالا نہیں دیکھا

 ساجن نے مِرا روپ نرالا نہیں دیکھا

جھومر نہیں دیکھا مِرا جھالا نہیں دیکھا

کس روگ نے چہرے پہ مِرے زردی اتاری

کس سوگ میں ملبوس ہے کالا، نہیں دیکھا

جلتی ہوئی دیکھی نہیں اِن آنکھوں میں حسرت

دُوری سے پڑا دل پہ جو چھالا، نہیں دیکھا

کس نام کی مہندی ہے رچی ہاتھوں میں میرے

کانوں میں ہے کس نام کا بالا، نہیں دیکھا

مسکان لبوں کی مِرے دیکھی تو ہے اس نے

سینے سے جو اٹھتا ہے وہ نالا، نہیں دیکھا

ہر داغ جو اس دل کا بنا لعلِ بدخشاں

ہر اشک جو گوہر میں ہے ڈھالا، نہیں دیکھا

کس طرح سے اس ذاتِ شکستہ کو سمیٹا

کس طور سے ہے خود کو سنبھالا، نہیں دیکھا

نسرین جنوں کا ہوا کس دھج سے مداوا

وحشت سے ہو وحشت کا ازالا، نہیں دیکھا

نسرین سید