تمام دنیا میں جتنے ظالم جہاں جہاں ہیں انہیں بتا دو

 اعلان

تمام دنیا میں جتنے ظالم جہاں جہاں ہیں انہیں بتا دو

کہ نسلِ آدم کی جتنی ذلت تھی ان کے بس میں وہ کر چکے ہیں

جو ان کی پلکوں کی جنبشوں میں حیات پاتے تھے مر چکے ہیں

یہی افق تھے کہ جن میں صدیوں سے کوئی سورج

نہیں اُگا تھا

یہی زمینیں تھیں جن کا جوبن

پرائے لوگوں میں بَٹ رہا تھا

یہی وہ گمنام دلہنیں تھیں کہ جن کے ماتھوں

پہ کوئی جھُومر نہیں سجا تھا

انہیں بتا دو اداس نسلوں کے خواب رستے نِکھر چکے ہیں

سیاہیوں کے عقب سے پھُوٹی ہے روشنی کی امید آخر

قفس نشینوں کو مِل رہی ہے رہائیوں کی نوید آخر

گلاب جسموں سے ہونے والی ہے اب ہوس کی کشید آخر

انہیں بتا دو کہ تشنہ کاموں کے صبر پیمانے بھر چکے ہیں

جو اپنے ہونے سے منفعل تھے

سروں کو تانے ہوئے کھڑے ہیں

نواحِ ظلمت میں قریہ قریہ

نئی سحر کے عَلم گڑے ہیں

غبار آسا جو منتشر تھے

مثالِ کوہِ گراں اَڑے ہیں

انہیں بتا دو کھُلے فلک سے غلام سورج گزر چکے ہیں

تمام دنیا میں جتنے ظالم جہاں جہاں ہیں انہیں بتا دو

جو ان کی پلکوں کی جُنبشوں میں حیات پاتے تھے مر چکے ہیں

امجد اسلام امجد