آوارگان صحرا کوئے صنم نہ ڈھونڈیں

آوارگانِ صحرا کُوئے صنم نہ ڈھونڈیں

جلووں کی وہ بہاریں زُلفوں کے خم نہ ڈھونڈیں

اے شہر سنگ! تجھ میں زخموں کی کیا کمی ہے

تیغ‌ ادائے جلوہ بہتر ہے ہم نہ ڈھونڈیں

وہ آبروئے‌ وحشت لائیں تو اب کہاں سے

وہ جنت تمنا وہ دشت غم نہ ڈھونڈیں

حاصل نہ ہوگا کچھ بھی جُز داغ‌ و درد عبرت

اہل وفا ہمارا نقش قدم نہ ڈھونڈیں

مقصد ہے صرف اتنا وعدوں کی چاندنی کا

خواب سحر تو دیکھیں تعبیر ہم نہ ڈھونڈیں

ہم بے نیاز گزرے شہرت کی سازشوں سے

نام و نشاں ہمارا اہل قلم نہ ڈھونڈیں

جاں دی سروش ہم نے راہِ خلوصِ غم میں

فردِ عمل ہماری دَیر و حرم نہ ڈھونڈیں

متین سروش

مرزا متین بیگ