فریبِ عشق میں دل کو نثار کر بیٹھے
کسی کی چاہ میں دل سوگوار کر بیٹھے
چلے تھے گھر سے تمنا لیے محبت کی
فضول بات پہ دل بے قرار کر بیٹھے
پرائی آگ میں جلنے سے کچھ نہیں حاصل
بُرے نصیب تھے اپنے جو پیار کر بیٹھے
میں جا رہا ہوں کسی کے گمان سے لیکن
میں لوٹ آؤں گا خود کو سنوار کر بیٹھے
مِرے خیال سے وہ شخص خوب اچھا ہے
جو دل لگی نہ کرے دل کو مار کر بیٹھے
وفا شعار ہوں مخلص ہوں مثلِ گوہر ہوں
ہمارے عیب وہ کب سے شمار کر بیٹھے
گوہر فرید
No comments:
Post a Comment