جذبوں کے تقدس کی تجارت نہیں کرتے
ہم لوگ دِکھاوے کی محبت نہیں کرتے
کچھ فیصلے بروقت ہی ہو جائیں تو اچھا
ہم وعدۂ فردا کی سیاست نہیں کرتے
ہر بار دیا اک نئے انداز سے دھوکا
ہر بار مگر تجھ سے شکایت نہیں کرتے
چہرے پہ ندامت تِرے دیکھی نہیں جاتی
ثابت ہو تِرا جُرم یہ چاہت نہیں کرتے
ہوتے کسی دربار کے منصب پہ مقرر
گر حرف معانی سے بغاوت نہیں کرتے
جو آپ سمجھتے ہیں، سمجھ لیجئے مطلب
ہم اپنے اصولوں کی وضاحت نہیں کرتے
ہر شوخ ادا صائمہ اب بھُول چکے ہیں
پنچھی ہوں قفس میں تو شرارت نہیں کرتے
صائمہ کامران
No comments:
Post a Comment