اب تِرا بھی نہیں ملال ہمیں
لوگ کہتے ہیں با کمال ہمیں
اب کسی کو ہماری فکر نہیں
اب کسی کا نہیں خیال ہمیں
اس قدر زہر بار کر لہجہ
شاق گزرے تِرا سوال ہمیں
ہم کہیں کھو چلے تھے جانِ من
ڈھونڈ لایا تِرا خیال ہمیں
ہنس پڑے ہیں وفا کا سن کر نام
یاد آئی تِری مثال ہمیں
اب نہ ہو درپئے مداوائے غم
آ چکا راس اپنا حال ہمیں
کیوں مسلسل یہ سوچ رہتی ہے
کُوچ کرنا ہے اب کی سال ہمیں
اپنی نظروں سے گر گئے ہیں ہم
کر دیا کس نے پائمال ہمیں
ہجر کی رات دل شکن ہے بہت
یاد آ لذت وصال! ہمیں
آئی تھیں اِنبساط کی گھڑیاں
کر گئیں اور شکستہ حال ہمیں
شمس خود سے ہی یہ عداوت کیوں
رنج دیتا ہے تیرا حال ہمیں
شمس خالد
No comments:
Post a Comment