مصلحت کا ہے دور چپ خاموش

 مصلحت کا ہے دور، چپ خاموش

میرے اندر کے شور، چپ خاموش

بول سکتے نہیں تو سہتے رہو

وقت کا ظلم و جور، چپ خاموش

اک تو دیوار و در بھی بے بہرہ

اس پہ یہ چشمِ کور، چپ خاموش

افف یہ جنگل کی آگ کی سُلگن

اس پہ ناچے ہے مور چپ خاموش

تجھ کو اب تک بھی اس سے ہے امید 

اے محبت کی ڈور، چپ خاموش

وقتِ رخصت بھی کیا عجب شے ہے

دونوں پتھر، کٹھور، چپ خاموش

گُنگ حرف و زبان اس کے بھی

میں بھی بے جان اور چپ خاموش

تجھ سے کچھ بات کرنا چاہتی ہے

آنکھ گہری بلور، چپ خاموش

کوئی زنجیر مجھ کو کھینچے ہے

ہر گھڑی تیری اور، چپ خاموش

فرح گوندل