دل تِری یاد سے رہا آباد
تجھ کو رکھے مِرا خدا آباد
کتنا ویران تھا میں اندر سے
یاد آیا تو میں ہُوا آباد
تُو بہت دیر تک رہا مجھ میں
میں بہت دیر تک رہا آباد
ان پرندوں کو اڑتے رہنے دو
ان پرندوں سے ہے فضا آباد
تیرے نغمے کے سوز نے رکھا
میرے دل کا نگر سدا آباد
ایک میں ہوں خراب حالت میں
ساری دنیا مِرے سوا آباد
تُو نے دکھ بھر دیا مِرے اندر
تُو مجھے کیسے کر گیا آباد
امان اللہ خان
No comments:
Post a Comment