ہو جائے کسی طور جو تکمیلِ تمنا
لہجوں میں اتر آئے گی تفضیلِ تمنا
سنتا رہا تاویلِ جفا اس کی زباں سے
بہتا رہا آنکھوں سے مری نیلِ تمنا
اس صورتِ مریم کو سرِ بام جو دیکھا
سینے میں اتر آئی اک انجیلِ تمنا
ایسا بتِ کافر ہے کہ دیکھا نہیں مڑ کر
ہر چند کہ ہوتی رہی تعلیلِ تمنا
مدھم ہوئی آنکھوں میں تو پھر دل میں جلا لی
پر بجھنے نہیں دی کبھی قندیلِ تمنا
اس عہدِ اذیت میں اتارا گیا مجھ کو
جس عہد میں ہوتی رہی تذلیلِ تمنا
بلال اعظم
No comments:
Post a Comment