چین کب آئے گا دل برباد

 چین کب آئے گا دلِ برباد

بھول جا بےوفا کو مت کر یاد

شہر کا شہر تیرا ہے دشمن

ہونے دے جو بھی ہوتی ہے بیداد

شہرِ حاکم کے کان بہرے ہیں

پھر بھلا کیسے وہ سنے فریاد

میرا مونس اگر ہے پڑھ لے وہ

میری آنکھوں میں ہے لکھی روداد

اب بھروسہ کریں تو کس پہ کریں

کون ہے دوست کون ہے صیاد

سب کے چہروں پہ دو دو چہرے ہیں

مولا جانے کہ کون ہے بہزاد

میرے احباب سب منافق ہیں

وہ سلامت رہیں سدا اور شاد

ان کا بزمِ سخن میں ہے یہ طور

شعر سنتے ہیں دیتے کب ہیں داد

عمر بھر ہجر و یاس میں گزری

ہے مقدر تمہارا یہ شہزاد

ضیا شہزاد