خزاں سے ادھڑے ہوئے پھولوں کے لباس نہ ٹانک

 خزاں سے ادھڑے ہوئے پھولوں کے لباس نہ ٹانک

اب اس کی یاد سے مولا میرے حواس نہ ٹانک

میں رو پڑوں گا میرے غم کا امتحاں مت لے

فصیلِ ضبط پہ تصویرِ غم شناس نہ ٹانک

لباس عشق پہ پیوند مت لگا میرے دوست

جو ہو سکے تو تصوّر پہ کوئی آس نہ ٹانک

💚خیالِ یار جو پایا سو یار کو پایا💚

اب انتظار کے دامن پہ تو قیاس نہ ٹانک

لباس زیست پہ ترپائی شکر و صبر کی کر

یقین کاریاں کر اس پہ دوست یاس نہ ٹانک

نہ ٹانک شہرِ خموشاں میں چھب اداسی کی

اگر تو ٹانک رہا ہے تو پاس پاس نہ ٹانک

ذرا سی اس میں تو گنجائش خوشی بھی رکھ

کہ ہر جگہ تو شبیہیں اداس اداس نہ ٹانک

طارق عثمانی