کیا کہیں کیا دیکھ کر صحنِ چمن یاد آ گیا
ابتدائے عشق کا دیوانہ پن یاد آ گیا
کتنی کیف آگیں تھی کلیوں کے چٹکنے کی صدا
ایک مستِ ناز کا طرزِ سخن یاد آ گیا
دیکھ کر آہُو ہمیں ہمدمِ خُتن آیا نہ یاد
ابروئے جاناں کا لیکن بانکپن یاد آ گیا
اے محبت کوئی بھی عالم ہو لیکن بزم پر
رنگ جب آیا، وہ شمعِ انجمن یاد آ گیا
دل کو واعظ موہے لیتا تھا تِرا طرزِ کلام
یک بہ یک ہم کو زمانے کا چلن یاد آ گیا
اہلِ عالم جاگ اٹھے میری صدائے شوق پر
دہر کو ہنگامۂ دار و رسن یاد آ گیا
بڑھ گیا جوشِ محبت گھٹ گیا طوفانِ غم
اضطرابِ قیس و عزمِ کوہکن یاد آ گیا
شعر سن کر میرے خالد لوگ سر دُھننے لگے
اور مجھے وہ رونقِ بزمِ سُخن یاد آ گیا
خالد مینائی
No comments:
Post a Comment