چراغ عشق جلا لوں تو کوئی بات کروں

 چراغِ عشق جلا لوں تو کوئی بات کروں 

اندھیرے دل کے مٹا لوں تو کوئی بات کروں 

لُٹا دوں راہ میں اس کی میں اپنی سب پُونجی 

ذرا سی نیکی کما لوں تو کوئی بات کروں 

غُبارِ وقت میں اُلجھی ہے میری راہگزر 

سفر کی لاج بچا لوں تو کوئی بات کروں 

بہت اُداس ہے رات اور رو برو ہے فراق 

نوائے میر سنا لوں تو کوئی بات کروں 

مجھے بھی دشت کی آوارگی سے ربط ہے کچھ 

یہ خاکِ دشت اُڑا لوں تو کوئی بات کروں 

پلٹ کے آئے ہو مُدت کے بعد آنکھوں میں 

یہ اشکِ ہجر گرا لوں تو کوئی بات کروں 

سہارہ دونوں جہاں میں عمل کا ہے ریشم

یہ بات سب کو بتا لوں تو کوئی بات کروں 

ریشما ریشم زیدی