اب کے برس مرے نبی جائے اماں نہیں رہی

 عارفانہ کلام نعتیہ کلام

اب کے برس مِرے نبیؐ جائے اماں نہیں رہی

آقاﷺ کرم کہ رونقِ کون و مکاں نہیں رہی

آقاؐ کریمﷺ اس برس دل کا نگر ہی لُٹ گیا

اپنا بھی گھر اُجڑ گیا اپنی بھی ماں نہیں رہی

کس کو سناؤں حالِ غم کون سنے گا داستاں

پُرسشِ قلبِ ناتواں شاہِ زماںﷺ نہیں رہی

میرے کریم آپؐ کے عشق کی گرمیوں میں گم

سارے زمین و آسماں رُت یہ کہاں نہیں رہی

جب سے خدائے پاک نے آپﷺ کا در عطا کیا

زیست تھی روح پر گِراں اب وہ گِراں نہیں رہی

نعتِ رسولِ پاکؐ سے عیبِ سخن ہی مٹ گئے

حرف اُتر کے آ گئے، اب وہ زباں نہیں رہی

جب سے درودِ پاکﷺ کا ورد کیا ہے دم بدم

داغ دلوں کے دُھل گئے آہ و فغاں نہیں رہی

چاند ہوا ہے چاک چاک، شمس پلٹ کے آ گیا

عرش کی سیر تک ہوئی، خُلد نہاں نہیں رہی

انؐ کی تمیمی نسبتیں ایسے ہوئیں ہیں عیب پوش

نقص چھپا لیے گئے،۔ قبح عیاں نہیں رہی

علی اعجاز تمیمی