توڑ کر جس نے دوبارہ مہ کامل باندھا

عارفانہ کلام نعتیہ کلام

توڑ کر جس نے دوبارہ مہِ کامل باندھا

میں نے اس ہاتھ سے یہ ٹوٹا ہوا دل باندھا

بس ارادہ ہی کیا تھا کہ چلوں سوئے رسولؐ

ناقۂ شوق نے خود پیٹھ پہ محمل باندھا

استعارہ کوئی محبوب و محب کا نہ ملا

میں نے آئینے کے آئینہ مقابل باندھا

میرا رخ بھی اسی جانب ہے کہ طوفانوں میں

اہلِ مکہ نے مدینے ہی کو ساحل باندھا

آپؐ کی نرم مزاجی کا جو مضموں سوجھا

میں نے کافر کو بھی کافر نہیں غافل باندھا

ہو گیا سہل مجھے ذکرِ نبیﷺ سے عاصم

قافیہ میں نے کہاں کوئی بمشکل باندھا

لیاقت علی عاصم