دل کا مِرے جہان یہ وِیراں ہے کس لیے
تنہائیوں کے بوجھ سے نالاں ہے کس لیے
ہو جائے گا وجود تِرا خاک ایک دن
مٹی کے اس بدن پہ تُو نازاں ہے کس لیے
ہر گام پر بچائے گی ماں کی دعا تجھے
رستے کی مشکلوں سے ہراساں ہے کس لیے
اک پل بھی زندگی کا بھروسہ نہیں تِری
پھر سو برس کا رکھتا یہ ساماں ہے کس لیے
تم کو اگر نہیں ہے بچھڑنے کا کوئی غم
آنسو بتاؤ پھر سرِ مژگاں ہے کس لیے
خوشیاں ہیں جس قدر بھی یہاں سب ہیں عارضی
دنیا کی عشرتوں پہ تُو شاداں ہے کس لیے
جو روبرو کبھی تِرے آیا نہیں شزا
ہر خواب ہر خیال پہ رقصاں ہے کس لیے
شزا جلالپوری
شیزا جلالپوری
No comments:
Post a Comment