رقصِ بسمل تِری آواز پہ کرتے دیکھا
آتشِ لحن سے بادل کو بکھرتے دیکھا
تان دیپک نہیں اشرارِ ستم برسے ہیں
تیری آواز میں سورج کو اترتے دیکھا
رنگِ آنچل تِرا آتش میں ڈھلا ہو جیسے
اور تاروں کو سرِ زلف مچلتے دیکھا
جلتے دیپک نے بھی پکڑا ہے ہوا کا آنچل
گرمئ عشق سے اس کو بھی تڑپتے دیکھا
زلفوں میں گویا مچلتی ہے چمکتی بجلی
شمع دیدوں میں سرِ شام ہی جلتے دیکھا
چاندنی رات میں جلتا رہا فُرقت کا چراغ
اور دن میں کبھی سورج کو اُبلتے دیکھا
آتشِ عشق میں جلنے کو بدن مائل تھا
رمزی نے روح کو اپنی تو سنبھلتے دیکھا
معین لہوری رمزی
No comments:
Post a Comment