ان کے اندازِ کرم خاص ہوا کرتے ہیں
دل بڑھانا ہو تو دل توڑ دیا کرتے ہیں
آرزوؤں کے بھی کیا کھیل ہوا کرتے ہیں
نقش بنتے ہیں اُبھرتے ہیں مٹا کرتے ہیں
ان کا منشا ہے جسے وقت کہا کرتے ہیں
ورنہ حالات بھی انسان کو کیا کرتے ہیں
ہوش کی سانس بھی کھل کر نہیں لی جا سکتی
لوگ کیا جان کے جینے کی دعا کرتے ہیں
وقت پڑنے پہ ہر اک آدمی کُھل جاتا ہے
آزمائش کے مقامات ہوا کرتے ہیں
زینتِ جیب و گریباں ہیں نہ زیبِ کاکُل
ہم ہیں وہ پھول جو بے فصل کِھلا کرتے ہیں
شوق آنسو ہی زبانِ غم و آلام نہیں کچھ
کچھ تبسم بھی یہ مفہوم ادا کرتے ہیں
خواجہ شوق
No comments:
Post a Comment