عارفانہ کلام حمد نعت منقبت
صدائے قلب کو لفظوں نے باندھ رکھا ہے
نبیؐ کی یاد کو پلکوں نے باندھ رکھا ہے
خدا کے عرش پہ نعتِ نبیؐ کی محفل ہے
سماں حضورؐ کی زلفوں نے باندھ رکھا ہے
نصیبِ چشمِ تصور ہے اور مدینہ ہے
نظر کو روضے کے رنگوں نے باندھ رکھا ہے
غبارِ رہ گزرِ مصطفٰیﷺ کے صدقے میں
جہاں کو عشق کے سجدوں نے باندھ رکھا ہے
بھلا وہ غیر کی چوکھٹ پہ سر جھکائے کیوں
جِسے حضورؐ کے ٹکڑوں نے باندھ رکھا ہے
میں مانگتا ہوں گدائی بتولؑ کے در کی
دعا میں ہاتھوں کو اشکوں نے باندھ رکھا ہے
ہے سر جُھکائے دلاور درود وردِ زباں
خدا سے رابطہ سانسوں نے باندھ رکھا ہے
دلاور حسین دلاور
No comments:
Post a Comment