غم حسین کا یوں انتظار رہتا ہے

 عارفانہ کلام حمد نعت منقبت استقبالِ محرم

 

غمِ حسینؑ کا یوں انتظار رہتا ہے

تمام سال یہ دل بے قرار رہتا ہے

یہ معجزہ بھی ہے شبیرؑ تیری الفت کا

کہ ہم کو اشک بہانے سے پیار رہتا ہے

ہم اہل درد ہیں، ہم عاشقوں کی خوشیوں کا

غمِ حسینؑ پہ دار و مدار رہتا ہے

لہو بہا لیں جو جی بھر کے عصرِ عاشورہ

تمام سال پھر اُس کا خمار رہتا ہے

یہ تیرے غم سے جُڑا سیدہؑ کا وعدہ ہے

وگرنہ کس کو کسی غم سے پیار رہتا ہے

شریک ہوتے ہیں اہل عزا بے خوف و خطر

اگرچہ موت کا ہر سو حصار رہتا ہے

ہم آثموں کو کبھی یوں بھی رکھ لے محفل میں

کہ جیسے پھولوں کی سنگت میں خار رہتا ہے

غمِ حیات سے وہ بے نیاز ہے زیدی

غمِ حسینؑ میں جو اشکبار رہتا ہے

ارسلان علی زیدی