شب فراق میں رویا کیا سحر کے لیے
ترس ترس گئیں آہیں مِری اثر کے لیے
الٰہی خیر سے اس کی خبر ملے مجھ کو
چُھری ہے تیز وہاں مرغ نامہ بر کے لیے
بجا ہے بوسے کا گر نیل بن گیا رُخ پر
یہی تو داغ مناسب تھا اس قمر کے لیے
مریض ہجر نے دی جان تیری غفلت سے
نہ آیا ایک دن او بے خبر خبر کے لیے
پیام اس بُت شیریں ادا کا جب لایا
بڑھا کے ہاتھ قدم ہم نے نامہ بر کے لیے
خیال زُلف میں دن رات ہم ہیں سرگرداں
ازل سے تھا یہی سودا ہمارے سر کے لیے
دُعائیں مانگنا ہوں جتنی مانگ لے وہبی
کُھلا ہے بابِ اجابت ابھی اثر کے لیے
وہبی لکھنوی
شیو پرشاد وہبی
No comments:
Post a Comment