جب کربلا میں داخلہ شاہ دیں ہوا

 عارفانہ کلام حمد نعت منقبت

میدانِ کربلا

جب کربلا میں داخلۂ شاہ دیں ہوا 

دشت بلا نمونۂ خلد بریں ہوا

سر جُھک گیا فلک کا یہ اوج زمیں ہوا

خُورشید محو حُسنِ حسینِؑ حسیں ہوا 

پایا فروغ نیر دیں کے ظہور سے 

جنگل کو چاند لگ گئے زہراؑ کے نور سے 

دشت وغا میں نور خدا کا ظہور ہے 

ذروں میں روشنی تجلی طور ہے 

اک افتاب رخ کا ضیا دور دور ہے 

کوسوں زمین عکس سے دریائے نور ہے 

اللہ رے حُسن طبقۂ عنبر سرشت کا 

میدان کربلا ہے نمونہ بہشت کا 

اترو مسافرو کہ سفر ہو چکا تمام 

کوچ اب نہ ہو گا حشر تلک ہی یہیں مقام 

مقتل یہی زمین ہے یہی مشہد امام 

اونٹوں سے بار اتار کے برپا کرو خیام 

بستر لگاؤ شوق سے اس ارض پاک پر 

چھڑکا ہوا ہے اب بقاء یاں کی خاک پر

اترا یہ کہہ کے کشتئ امت کا نا خدا 

جتنے سوار تھے وہ ہوئے سب پیادہ پا

حضرت نے مسکرا کی ہر ایک سے کہا

دیکھو تو کیا ترائی ہے کیا نہر کیا فضا 

اکبرؑ شگفتہ ہو گئے صحرا کو دیکھ کر 

عباسؑ جھومنے لگے دریا کو دیکھ کر

صحرا پہ ہر طرف شہِ دیں نے نگاہ کی

سب تھم گئی سپاہ شہِ کم سپاہ کی

فرمایا؛ آج چھٹ گئی ایذا راہ کی

ہاں اب پسند کر لو جگہ خیمہ گاہ کی

آگے کہیں نہ جائیں گے اس ارضِ پاک سے

الفت ہماری خاک کو ہے یاں کی خاک سے

میر انیس