عارفانہ کلام حمد نعت منقبت
وہ کیسا وقت تھا
قیامت کی گھڑی تھی جب
امینِ حُرمتِ کعبہ نے اپنے ہاتھ سے باندھا ہوا
احرام کھولا تھا
یہ وہ لمحہ تھا جب صدیوں کے ماتھے پر
سکوتِ مرگ طاری تھا
ہوا خاکِ حرم کے زرد پہلو سے
لپٹ کے بَین کرتی تھی
در و دیوار کی نمناک آنکھیں ہجر کے نوحے سناتی تھیں
بلکہ راستے مولودِ کعبہ کی قسم دے کر
امامِ وقت کے پاؤں پکڑتے تھے
وہ کیسا وقت تھا جب وارثِ کعبہ
طوافِ عشق کے موقوف کر کے دشتِ غُربت میں
شہادت کا سفر آغاز کرنے جا رہا تھا
وہ کیسا مجمعِ حجاج تھا جو نرغۂ اعداء کی صورت
خاکِ کعبہ کو
لہو کا غُسل دینا چاہتا تھا
سنو
خونِ حسینؑ ابن علیؑ خاک حرم کے پاک ماتھے پر
نیاز عشق کی صورت اگر تقسیم ہو جاتا
تو کعبہ کربلا بن کر
ہمارے یومِ حج کو عاشور بنا دیتا
معصومہ شیرازی
No comments:
Post a Comment