بھڑک اُٹھا، سوزِ نہاں، کہتے کہتے
زباں جل گئی داستاں کہتے کہتے
مِٹی دیکھتے دیکھتے، نوجوانی
گلستان میں آئی خزاں کہتے کہتے
تحمل کی دُنیا لُٹی جا رہی ہے
یہ کیوں چُپ ہوا رازداں کہتے کہتے
یہ کیسی فضاؤں میں چھائی اداسی
ہوئی بند کس کی زباں کہتے کہتے
فسانہ مِرا ہو گیا ٹکڑے ٹکڑے
بندھی یوں مِری ہچکیاں کہتے کہتے
نہیں صرف تم جاگ اٹھا اک زمانہ
"ہمیں سو گئے داستاں کہتے کہتے"
بگڑتی ہے تقدیر اس طرح عالم
نہیں کہہ گیا کوئی ہاں کہتے کہتے
سید عالم واسطی
No comments:
Post a Comment