آنکھوں کا نور دل کی ضیا آپ ہی تو ہیں

 عارفانہ کلام حمد نعت منقبت

آنکھوں کا نور دل کی ضیا آپ ہی تو ہیں

ہر تیرگی میں راہنما آپﷺ ہی تو ہیں

تکرار و تثنیہ کو نہیں جس میں شائبہ

وہ ایک شاہکار خدا آپﷺ ہی تو ہیں

جن سے ہر ایک مرحلہ کرب میں ہمیں

درس ثبات و صبر ملا آپﷺ ہی تو ہیں

محتاج کون آپ کے دربار کا نہیں

امید گاہ شاہ و گدا آپﷺ ہی تو ہیں

ویران دل پہ ایک نگاہ کرم حضور

عزلت نواز ثور و حرا آپ ہی تو ہیں

شائستہ وجود ہو جعفر بھی آپ کا

وجہ وجود ارض و سما آپ ہی تو ہیں

جعفر بلوچ