کارل مارکس بـے بسی کی گفاؤں میں بیٹھے

 کارل مارکس

بـے بسی کی گُفاؤں میں بیٹھے

اِن غلاموں کی یہی فطرت ہے

زندگی بھر یہ دوزخی رہ کر

اِس خواہش کا بُت بناتے ہیں

موت کے بعد جئیں جنت میں

بیٹھ کر سامنے سدا بُت کے

چین کی بانسری بجاتے ہیں

پھر عقائد کی اوڑھ کر چادر

اپنے اپنے خداؤں کے در پر

روز افیون کے لگائیں کش

اور دُعاؤں کے دُھویں میں کھو کر

بھُول جاتے ہیں غُلامی کا عذاب

آج بھی ہے یہ جہالت جاری

آج تک ہے غنودگی طاری

معبدوں، جھونپڑوں، بازاروں میں

مُفلسی روز گڑگڑاتی ہے

کارخانوں میں ویشیاؤں سی

دل لُبھاتی ہے اپنے مالک کی

بھُوک سے دیکھ بلکتے بچّے

جیتی رہتی ہیں مائیں مر مر کے

باپ کاندھوں پہ اُٹھا کر ذمے

تنگ اُجرت میں گرانی سہہ کر

زندگی گور میں گُزارے ہے

مولوی، چودھری کہ ساہُوکار

ہیں معزز اسی غریبی سے

ان لُٹیروں کی مرتبت کا بھرم

اسی لعنت کی دین ہے لوگو

سب گناہوں کی کوکھ ہے غربت

جس سے مجبور زندگی پا کر

کوڑیوں بھاؤ میں بیچے عصمت

سب غلاموں کی لونڈیا محنت

چار سُو نارسا فقیری ہے

چند لوگوں کی بس امیری ہے

جن کے پنجوں سے خُوں ٹپکتا ہے

جن کے ناخن کُھرچتے رہتے ہیں

زندگی کے حسین چہرے کو

اِنہی سرمایہ دار جتھوں کی

ہوتی رہتی ہے مفادات کی جنگ

جس میں ایندھن کا کام آتے ہیں

عام لوگوں کے بے وقعت لاشے

یہ بلاؤں کا وہ شکنجہ ہے

جس میں انسانیت کی گردن ہے

بنی آدمؑ کے پنپنے کے لیے

اس سے چھٹکارہ بہت لازم ہے

زندگی کا یہی ہے روگ جسے

تم نے سمجھایا کارل مارکس ہمیں

ہم تمہارے بہت آبھاری ہیں

عمران ثاقب

*آبھاری; مشکور، شکرگزار، Thankful