عارفانہ کلام حمد نعت منقبت
اللہ رے کونین پہ احسانِ محمدﷺ
اب تک ہے رواں چشمۂ فیضانِ محمدﷺ
تحقیر کا گوشہ نہ کوئی ڈھونڈ منافق
ہر آیتِ قرآں ہے ثنا خوانِ محمدﷺ
اے اہلِ خِرد چاک گریباں کو نہ دیکھو
سرتاجِ سلاطیں ہیں گدایانِ محمدﷺ
بو جہل زمانے کے پشیماں ہی رہیں گے
بد بخت گھٹا پائیں گے کیا شانِ محمدﷺ
نفرت نہ کرو مل کے چلو شانہ بہ شانہ
ہر ایک کے حق میں ہے یہ فرمانِ محمدﷺ
بے جا نہیں حالات جو تیرے ہیں مخالف
چھوٹا ہے تِرے ہاتھوں سے دامانِ محمدﷺ
ٹھوکر میں تِری ہو گا یقیناً یہ زمانہ
اب سے بھی اگر تھام کے دامانِ محمدﷺ
آ چوم لوں پلکوں کو تِری زائرِ طیبہ
دیکھا ہے تِری آنکھوں نے ایوانِ محمدﷺ
احسن ملے فردوس تو خاطر میں نہ لاؤں
فردوس تو ہے کوچہ و دالانِ محمدﷺ
احسن اعظمی
محمد فاروق خاں
No comments:
Post a Comment