جنون شوق اب بھی کم نہیں ہے

جنونِ شوق اب بھی کم نہیں ہے
مگر یہ آج بھی برہم نہیں ہے
بہت مشکل ہے دنیا کا سنورنا
تِری زُلفوں کا پیچ وخم نہیں ہے
بہت کچھ اوربھی ہے اس جہاں میں
یہ دنیا محض غم ہی غم نہیں ہے
تقاضا کیوں کروں پیہم نہ ساقی
کِسے یاں فکرِ بیش و کم نہیں ہے
اُدھر مشکوک ہے میری صداقت
اِدھر بھی بدگمانی کم نہیں ہے
مِری بربادیوں کا ہم نشینو
تمہیں کیا خود مجھے بھی غم نہیں ہے
ابھی بزمِ طرب سے کیوں اُٹھوں میں
ابھی توآنکھ بھی پُرنم نہیں ہے
مجازؔ اِک بادہ کش تو ہے یقیناً
جو ہم سُنتے تھے، وہ عالم نہیں ہے

اسرار الحق مجاز
(مجاز لکھنوی)