کس عالم وحشت میں سکوں ڈھونڈ رہے ہیں

کس عالمِ وحشت میں سکوں ڈھونڈ رہے ہیں

کیا اہلِ خِرد کیفِ جنوں ڈھونڈ رہے ہیں

قاتل بھی ہے، خنجر بھی ہے موجود، مگر لوگ

مقتول ہی کے ہاتھ پہ خوں ڈھونڈ رہے ہیں

اے ظرفِ تنک مایۂ دنیائے دَنی، ہم

ظرف اب کوئی وسعت میں فزوں ڈھونڈ رہے ہیں

پس منظرِ ”کُن“ کیا تھا، ہمیں بھی تو ہو معلوم

ہم لمحۂ قبل از ”فَیَکُوں“ ڈھونڈ رہے ہیں

معلوم نہیں حلقۂ احباب میں ضامنؔ

وہ چیز جو ناپید ہے، کیوں ڈھونڈ رہے ہیں

ضامن جعفری