جب سے دل کشمکش گیسو و رخسار میں ہے

جب سے دل کشمکشِ گیسو و رخسار میں ہے

مومنوں میں ہے شمار اپنا نہ کفار میں ہے

سر میں دل میں جگر و دیدۂ خونبار میں ہے

رازِ الفت مِرا اب تک انہیں دو چار میں ہے

ایک وہ ہیں کہ ہر اک دل ہے خریدار ان کا

اک مِرا دل کہ تمنائے خریدار میں ہے

سر دیا جس نے رہِ عشق میں سردار ہوا

سچ ہے معراجِ محبت رسن و دار میں ہے

تشنہ کامانِ شہادت کی بجھا دو تشنہ لبی

اسی پانی سے جو پانی تِری تلوار میں ہے

کاسۂ چشمِ تمنا میں جو چاہے بھر دے

اے شہِ حسن کمی کیا تِری سرکار میں ہے

یوں تو دل کیا تھا مِرے دل کی حقیقت کیا تھی

اب سبھی کچھ ہے یہ جب سے نگہِ یار میں ہے

ناز اٹھاتا ہے کوئی اس کی جبیں سائی کے

آج پیشانئ بیدمؔ بڑی سرکار میں ہے

بیدم شاہ وارثی