وہ چشم زر کہاں یہ مری چشم تر کہاں​

وہ چشمِ زر کہاں، یہ مِری چشمِ تر کہاں​

ٹکرائی بھی تو جا کے نظر سے نظر کہاں​

جانا ہے تم کو، جاؤ، چلے ہو مگر کہاں​

میں ڈھونڈتا پھِروں گا تمہیں در بدر کہاں​

قصرِ شہی کی بات ہے قصرِ شہی کے ساتھ​

تیری گلی کہاں، تِرے دیوار و در کہاں​

دولت سے خوابگاہ تو جو بھی خرید لو​

نیندیں مگر خرید سکے مال و زر کہاں​

تُو آگ ہی لگا کے ذرا خود کو دیکھ لے​

تجھ پر یونہی پڑے گی کسی کی نظر کہاں​

میں اپنا آپ ڈھونڈ رہا ہوں جہان میں​

مجھ کو عدیمؔ اور کِسی کی خبر کہاں​

یہ کس مقابلے کے لیے جا رہے ہو تم​

آنسو کہاں عدیمؔ، صدف کا گہر کہاں​

عدیم ہاشمی