حسن کو وسعتیں جو دیں عشق کو حوصلہ دیا​

حسن کو وسعتیں جو دِیں، عشق کو حوصلہ دیا​

جو نہ ملے، نہ مِٹ سکے مجھ کو وہ مدعا دیا ​

ہاتھ میں لے کے جامِ مے آج وہ مسکرا دیے​

عقل کو سرد کر دیا، روح کو جگمگا دیا ​

دل پہ لیا ہے داغِ عشق کھو کے بہارِ زندگی ​

اک گلِ تر کے واسطے میں نے چمن لٹا دیا ​

کچھ تو کہو یہ کیا ہوا، تم بھی تھے ساتھ ساتھ کیا ​

غم میں یہ کیوں سرور تھا، درد نے کیوں مزا دیا​

اب نہ یہ مِری ذات ہے، اب نہ یہ کائنات ہے​

میں نے نوائے عشق کو ساز سے یوں ملا دیا ​

عکس جمالِ یار کا آئینہ خودی میں دیکھ ​

یہ غمِ عشق کیا دیا، مجھ سے مجھے چھپا دیا ​

حشر میں آفتابِ حشر اور وہ شورِ الاماں​

اصغرؔ بت پرست نے زلف کا واسطہ دیا 

اصغر گونڈوی