ہر زخم کی لو حاصل حسن رگ جاں ہے

ہر زخم کی لو حاصل حسن رگ جاں ہے 

کچھ دن سے یہی رسم و رہِ دل زدگاں ہے

کل تک یہاں زخموں کی نمائش پہ تھی قدغن 

اب محوِ تماشا ہی صف چارہ گراں ہے

گھر کس نے جلایا ہے، کسے کون بتائے

منصف ہے یہاں آگ، گواہوں میں دھواں ہے

اک پل کو ٹھہر جائے تو کہلائے یہی موت

یہ خون کی اک بوند کہ شہ رگ میں رواں ہے

سورج کی سواری سوا نیزے پہ رکی ہے 

اے قامت دلدار، تُو اس وقت کہاں ہے

جس شہر کو آباد کیا سنگ دلوں نے 

اس شہر کے ہر موڑ پہ شیشے کی دکاں ہے

دیکھیں تو ہے سایہ بھی کسی روح کا پرتو 

سوچیں تو یقیں کچھ بھی نہیں، صرف گماں ہے

ہے رنگ بھی نیرنگئ ادراک کا ملبوس 

نغمہ جسے کہتے ہو، حدِ ضبطِ فغاں ہے

اجڑی ہوئی آنکھوں سے ادھر خواب کریدو

کہتے ہیں خزانہ بھی خرابے میں نہاں ہے

اے جرأتِ اظہار، گھڑی بھر کو سنبھلنا

اے عرضِ ہنر، بارگہِ کم سخناں ہے

ٹوٹے تیری انگڑائی تو سوچے تیرا فنکار

خوشبو کا بھنور ہے، یہ دھنک ہے کہ کماں ہے

محسؔن میری خواہش ہے کہ مقطع میں یہ کہہ دوں 

اے بوڑھی صدی دیکھ، میری سوچ جواں ہے

محسن نقوی