کیا سمندر سے چرا لائی کہاں سے آئی

کیا سمندر سے چرا لائی، کہاں سے آئی

تیری آنکھوں میں یہ گہرائی کہاں سے آئی

اجنبی! یہ تو بتانا کہ تِری باتوں میں

اتنی صدیوں کی شناسائی کہاں سے آئی

میرے زخموں کو تو ناسُور بتاتے تھے سبھی

تیرے ہاتھوں میں مسیحائی کہاں سے آئی

میری آنکھوں پہ چمک اٹھے مناظر کیسے

ایک نابینا میں بینائی کہاں سے آئی

تیرا مُبہم سا اشارہ بھی سمجھ لیتا ہے

دلِ ناداں میں یہ دانائی کہاں سے آئی

سر پہ الزام لیے نام کمائیں خاورؔ

کوچۂ عشق میں رسوائی کہاں سے آئی

خاور احمد