ہم خوش ہوئے اتنے کہ پریشاں نظر آئے

جب بھی تِری قربت کے کچھ امکاں نظر آئے

ہم خوش ہوئے اتنے کہ پریشاں نظر آئے

دیکھوں تو ہر اک حسن میں جھلکیں تِرے انداز

سوچوں تو فقط گردشِ دوراں نظر آئے

ٹوٹا جو فسونِ نگہہِ شوق، تو دیکھا

صحرا تھے جو نشے میں گلستاں نظر آئے

کانٹوں کے دلوں میں بھی وہی زخم تھے لیکن

پھولوں نے سجائے تو نمایاں نظر آئے

اک اشک بھی نذرِ غمِ جاناں کو نہیں پاس

ہم آج بہت بے سر و ساماں نظر آئے

جو راہِ تمنا کے ہر اک موڑ پہ چپ تھے

جب دار پہ پہنچے تو غزل خواں نظر آئے

کیا جانیئے کیا ہو گیا اربابِ نظر کو؟

جس شہر کو دیکھیں وہی ویراں نظر آئے

کیا روپ نگاہوں میں رچا بیٹھے کہ ان کو

گلشن نظر آئے، نہ بیاباں نظر آئے

اک عمر سے اس موڑ پہ بیٹھے ہیں جہاں پر

اک پل کا گزرنا بھی نہ آساں نظر آئے

صادق کی نگاہوں کو ہی ٹھہراو نہ مجرم

آئینے ہر اک دور میں حیراں نظر آئے

صادق نسیم