سینے میں پھر سے اے دل بے تاب آ کبھی

اے جانِ نشہ روحِ مئے ناب آ کبھی

حرفِ نگُفتہ معنئ نایاب آ کبھی

تاریک ہے مِری رگِ جاں اک زمانے سے

اے رشکِ مہر، غیرتِ مہتاب آ کبھی

نکلے کسی طرح یہ مِرا شوقِ عافیت

تُو میرے گھر میں صورتِ سیلاب آ کبھی

یاں میرے پاس شورشِ اہلِ جہاں سے دور

ہاتھوں میں تھام کر صدفِ خواب آ کبھی

موتی ہوں مِری آب کفِ دست پر نہ دیکھ

ہو مجھ کو دیکھنا تو تہِ آب آ کبھی

مجھ پر بہت گراں ہے یہ یکسانئ حیات

سینے میں پھر سے اے دلِ بیتاب آ کبھی

خورشید رضوی